ට්‍රම්ප් සමීක්ෂණ වාර්තාවලින් බයිඩන්ට ළං වෙයි

ට්‍රම්ප් සමීක්ෂණ වාර්තාවලින් බයිඩන්ට ළං වෙයි

6 August 2020 11:45 am

ඇමරිකානු ජනාධිපතිවරණය පිළිබඳ සමීක්ෂණ වාර්තා අනුව මෙතෙක් ජනප්‍රියත්වයෙන් සැලකිය යුතු මට්ටමකින් ජනාධිපති ට්‍රම්ප් අභිබවා සිටි ඩිමොක්‍රටික් අපේක්ෂක ජෝ බයිඩන්ගේ ජනප්‍රියත්වය අඩුවන බවක් පෙනෙනවා.

The Hill පුවත් ආයතනය කළ සමීක්ෂණයකදී සොයාගන්නා ලද්දේ ඊට සහභාගී වූ සියයට 43ක් බයිඩන්ට ඡන්දය දෙන බව ප්‍රකාශ කරද්දී සියයට 40ක් ට්‍රම්ප්ට ඡන්දය දෙන බව ප්‍රකාශ කරන බවයි. මේ අනුව දෙදෙනා අතර පරතරය සියයට 3 දක්වා අඩුවී තිබෙනවා. ජූලි මාසය මැදදී මෙම ආයතනය විසින් කළ සමීක්ෂණයේදී බයිඩන් සියයට 7 ක් ඉදිරියෙන් සිටියා.

ඇමරිකාවේ මධ්‍ය බටහිර ප්‍රාන්තවල ඡන්දදායකයන් අතර හා පක්ෂයකට සම්බන්ධ නැති ඡන්දදායකයන් අතර ට්‍රම්ප්ගේ ජනප්‍රියත්වය ඉහළ ගොස් තිබෙනවා.

මෙම සමීක්ෂණය සඳහා 2,850 දෙනෙකු සම්බන්ධ කරගෙන තිබුණු අතර වැරදීමේ සම්භාවිතාව 1.84% බව සමීක්ෂකයින් පවසනවා.

මේ අතර මෑතදී පවත්වන ලද ජාතික මට්ටමේ සමීක්ෂණ වාර්තා තුනකට අනුව බයිඩන් සාමාන්‍යයක් ලෙස ට්‍රම්ප්ට වඩා සියයට පහකින් ඉදිරියෙන් සිටිනවා. මෙය ද කලින් තිබුණ තත්ත්වයට වඩා ට්‍රම්ප් ඉදිරියට එන ලකුණක්.

සමීක්ෂණ වාර්තා සහ ජනාධිපතිවරණයේ අවසන් ප්‍රතිඵලය වෙනස් වියහැකි අතරම, මැතිවරණයට තවත් මාස තුනක්ම තිබෙනවා. එහෙත් ජාතික මට්ටමේ සමීක්ෂණවලින් පොදුවේ එක් අපේක්ෂකයකු පැහැදිලි ලෙස ඉදිරියෙන් සිටියේ නම් මැතිවරණ දිනයේදී ඔහුට තිබෙන වාසිය වැඩි වීම නොවැළැක්විය හැකි දෙයක්. ට්‍රම්ප් සිය පරතරය අඩු කිරීම ඔහුට පැහැදිලි වාසියක් ගෙනෙනවා.

ඇසි දිසි මානය