කොරෝනා කාලේ ආලය - ප්‍රියත් ලියනගේ

කොරෝනා කාලේ ආලය - ප්‍රියත් ලියනගේ

26 May 2020 06:11 pm

කොරෝනා නිවාස අඩස්සියේ තවත් මසක් නිමවෙයි. මේ වෙසක් මාසයයි. වෙසක් රැය ගෙවුනේ  මින් පෙර කිසිදා අත් නොවිඳි හුදෙකලාවෙක ගිලෙමිනි. සීතලක් නොදැනුනත් වසංගත බියෙන් මුළු මහත් මානව සංහතිය මුලු ගන්වා පහළොස්වක සඳ පෙර නොදුටු දීප්තියකින් බැබලුණි. සඳත් මාත් අතර රෑ අහස කොනිත්තන  තරු රංචු. දුමෙන් මිදි සොඳුරු සිහින් සුළං රල සඳ රැස් සිලිලාරේ සුමුදු හඬින් මුමුණයි. කෑලි කැපිය හැකි හඳ  එළිය. පොකුරු ගැසී රල මෙන් සිහින් පොද අතරින් ගලාහැලී තුරුලට වසඟ සඳකැන් ගත සිත කිතිකැවූ සොඳුරු රාත්‍රිය. නිදි සොයනා යහනේ භව පුබුදන සුසුමක මුසුවූ සඳ රැසක සුවඳ, මිමිනුම; වෙසඟ නිසාවේ  ශාන්තියේ සරා සඳ!

පහනක, සැරැසි ලන්තෑරුමකින් හෝ කාන්දු වී අඳුර හා පොර බදන කිරණ රැහැනක් නැති,  අටපට්ටමේ රැලි සිලිසිලිය අහිමි, අහස් ගැබ පාලුව ඉරා  නැගෙන සාදුකාරය,  හේවිසි හඬ, ගුවනට මුසු නොවන මහ පිරිත. මිහි මත පෙර නොවූ අයුරින්, බටහිර ශිෂ්ටාචාරයේ තැවරුණු මුළු මහත් මිහි තලය එක් කළ බියකරු මරු රැගෙන එළිපත්තට ආ කොරෝනා රාත්‍රීය. වෙසක් සඳ ගිලිහී අමාවක අඳුරින් ගිලුණු තවත් රැයක්.

 තිස් වසක් පුරා ගෙවුණු බිහිසුණු රාත්‍රී දස දහසක අමිහිරි ආවර්ජනය. දැයෙක ජය? තවෙකෙක පැරදුම? දිවි පුදා, දිවි නසා රැකි මව් බිමෙක බොල් පොලව තෙත් කල විරු, සතුරු එක ලේ, කඳුළු සහ දහදිය. සමරමු කෙළෙස සුවහසක් මලවුන්ගේ සහ මරුවන්ගේ ජය, පරාජය. 

 අමාවක අඳුර දුරලමින් මෝදු වන නව සඳ, ඊද් උල් ෆිත්ර් ..... ඒ සඳ, නොබෝ දිනෙකින් ... පිරී දිදුලන පොසොන් සඳ ... මිහින්තලයට මක්කමට පායන සඳ! ... මහා ශිව රාත්‍රී, පාස්කු දා ........ රදාවානේ වෙල් එලියට, නිව්යෝක් නුවරට පෑයූ සඳ ... දේශානුරාගයෙන්, අන්ධ භක්තියෙන් නොකිලිටි සෙනෙහසේ සරා සඳ ....... කොරෝනා රාත්‍රීයේ මරණය මෙන් සම ව සඳකැන් ගෙනෙන කළුවර පුර හඳ ...   

ලොව සැම එක් කළ මර බිය හමුවේ ..... ‘පිවිතුරු සිහිනය’........ සඳහා පිවිසෙමු අප සැම. අහසක්, සෙනෙහසින් බැඳී මිහිතලයේ උරුමයක සිහිනය. මෝහය දුරලා ප්‍රේමය හා බැඳෙන මියැසියේ රැයක රිද්මය. දහමක, දැයෙක හෝ දෙසක අනුරාගයෙන් නොකිලිටි අනාගතයක සිහිනය.

 

රැයේ නිහඬ දෝංකාරය විනිවිද ඇසෙන, ඇදහිය යුතු එකම දහම .....ජීවිතයේ, ප්‍රේමයේ බැති ගීය, දිවිදී හෝ තවෙකෙක් මරා රකිනා ජාතිකාභිමානය, ..... රට, දැය, සමය අතහැර පිවිසෙමු සිහිනයට .....      එහි අරමුණට. සඳ ඉපැදුනු මියෙන රැයේ මා සවනට මුසු වූ ජෝන් ලෙනන් ..... ඒ රාත්‍රියේ නිහඬ බව බිඳිමින් ගලා එන මානව සෙනෙහසේ මිහිර............ සදාතන ප්‍රේමයේ ...... තත් හඬ  ....

Imagine there's no heaven
It's easy if you try
No hell below us
Above us only sky
Imagine all the people living for today
 
Imagine there's no countries
It isn't hard to do
Nothing to kill or die for
And no religion too
Imagine all the people living life in peace, you
 
You may say I'm a dreamer
But I'm not the only one
I hope some day you'll join us
And the world will be as one
 
Imagine no possessions
I wonder if you can
No need for greed or hunger
A brotherhood of man
Imagine all the people sharing all the world, you
 

වළා රොදට ඔබ්බෙන් නැත සුර පුර  
මිහි ගැබ නිරයක් නැත කකියන   
එක අහසක හිරු, සඳු, තරු යට 
එක් වෙමු අද දවසේ ……….
 
රට රට සීමා වෙන් තොර,     
නොබෙදුණු ලොවක් පතා   .....
දිවි පුදා හෝ තවකෙක් මරා 
රකිනට රට ජාතිය ආගමක්  නැතී ......... 
එක්වෙමු අප සැම මිහි මත,  
සාමය සිතෙහි දරා   
 
ඒ සිහිනය ඉටුවේ නම්  
ඔබ මා එක්වෙමු ඒ සිහින ලොවේ 
අප වැනි සිහින දකින්නන්  
ලොව එක් වන දිනයේ 
 
මම නැති මා සතු කිසිවක් නැති    
තර ගිජු පරපුටු වෝ නැති 
සා ගින්නෙන් මරු දුටු වෝ නැති
සොඳුරු මිහිරි මතු දවසක   
සොහොයුර, ඔබ මා, මා ඔබ  
එක් වෙමු ලෙස එක මව ගේ දරුවෝ 
 
- ජෝන් ලෙනන් ගැයූ, ජෝන් සහ යෝකෝ ඕනෝ නිර්මාණය කළ,  Imagine ගීතයේ අනුවාදයක් නිර්මාණය කිරීම ට ගත්  උත්සාහයකි.