රනිල් එක්සත් ජාතික පක්ෂ නායකත්වයෙන් ඉවත් වීමට සූදානමින් ......

රනිල් එක්සත් ජාතික පක්ෂ නායකත්වයෙන් ඉවත් වීමට සූදානමින් ......

9 August 2020 08:45 am

රනිල් වික්‍රමසිංහ මහතා එක්සත් ජාතික පක්ෂ නායකත්වයෙන් ඉවත් වීමට සූදානමින් සිටින බව ආරංචිමාර්ග සඳහන් කරයි. 

මහමැතිවරණයේදී ලද ඓතිහාසික පරාජයෙන් අනතුරුව උද්ගතවී ඇති වාතාවරණය සම්බන්ධයෙන් ඒ මහතා තම අභ්‍යන්තර කවයේ සමීපතමයින් සමඟ පසුගිය දින කිහිපයෙහි දීර්ඝ වශයෙන් සාකච්ඡා කර ඇති අතර පක්ෂයෙහි උන්නතිය වෙනුවෙන් තමන් නායකත්වයෙන් ඉවත් වීමට සූදානම් බව ඒ මහතා විසින් ප්‍රකාශ කර ඇති බවයි ආරංචිමාර්ග සඳහන් කළේ. 

කෙසේවෙතත් තමන්ගේ අනුප්‍රාප්තිකයා වශයෙන් නම් කරන්නේ කවුරුන්ද යන බරපතළ ප්‍රශ්නය නිසා රනිල් වික්‍රමසිංහ මහතාගේ නායකත්වයෙන් ඉවත් වීම ප්‍රකාශයට පත්කිරීම ද ගැටළු සහගත වී ඇති බවත් වාර්තා විය. 

රුවන් විජේවර්ධන මහතාට එජාප නායකත්වය බාරදෙන ලෙස ඉල්ලීම් පැමිණිය ද මෙවන් අති දුෂ්කර මොහොතක ඔහුට නායකත්වය ලබාදුනහොත් පක්ෂය බිඳී විසිරී විනාශයට පත්වීම නොවැළැක්විය හැකි වනු ඇති බවට ද වික්‍රමසිංහ මහතාගේ සමීපතමයින් අනතුරු හඟවා ඇති බවත් ආරංචිමාර්ග ප්‍රකාශ කළේය.