ආපසු හැරී එනු මැන මනෝ එක්කම - ලන්ඩන් කවි මාර්තු කලාපයෙන්

ආපසු හැරී එනු මැන මනෝ එක්කම - ලන්ඩන් කවි මාර්තු කලාපයෙන්

4 March 2021 11:01 am

ලන්ඩනයේ සිට මුදා හැරෙන ශ්‍රී ලාංකේය කවි සරණිය 'ලන්ඩන් කවි' මාර්තු කලාපය‍ මේ වනවිට වෙබ් අවකාශය වෙත මුදාහැර තිබෙනවා. ලන්ඩන් කවි ප්‍රවීන කිවියර අනුර හෑගොඩ මහතාගේ සංස්කාරකත්වයෙන් ඔබ අතට පත් වේ.

මෙවර මාර්තු කලාපය ප්‍රවීන හා නවක කවීන් 88 දෙනෙකුගේ කාව්‍ය රචනාවලින් ඔපවත් වී තිබෙනවා.

පහත පළවන්නේ, ලන්ඩන් කවි මාර්තු කලාපයේ ඇතුළත්, පසුගියදා අපෙන් සමුගත් ජයලාල් රෝහණ කලාකරුවා වෙනුවෙන් බණ්ඩාර ඇහැළියගොඩ මහතා රචනා කළ කාව්‍ය නිර්මාණයයි.

ආපසු හැරී එනු මැන ‘මනෝ’ එක්කම

තිරයද කරලියද එකිනෙකට යා වුන
විශ්මිත රැඟුම් පෑවා සතුට සාදන
ලංකාවටම ඔහු සරි කෙනෙකු නෑ වෙන
සමුගෙන ගොසින් ඇත ‘ජයලාල් රෝහණ’

පේරාදෙණිය, මොරටුව කොළඹ නම් ලද
සරසවි වලට ගොස් නැණ නුවන පිරිසිඳ
නව පරපුරට නොඅඩුව ලබා දෙන ලෙද
නෙක ගම් දනව් වෙත පා නැගුව සකි සඳ!

මහැදුරු සරත් සඳ බඳු ලොකු සර් ලා
විජයල මනෝලා තෙන්නෙල ජුඩීලා
අප හැර ගිය පසුව කුමටද හූල්ලා
ලාහෙන් මනින්නට නෑ ‘ජයලාල්ලා’

පිය සෙනෙහස අහිමි හිරිමල් ළමා විය
අප හැමදෙනාටම වැඩියෙන් විශේෂය
කරගැට කඳුළු දහදිය පිරි අතීතය
හෙළිකල කතා බහ මෙතැනින් හමාරය

තිරයට වේදිකාවට බැඳුණි ආලය
මතකෙට නැඟෙයි දෙසුමක ගැඹුරු තාලය
ඉගෙනුම පිණිස වැය කළ සියලු කාලය
ගිනිගෙන දැවෙයි දකුණේ පුස්තකාලය

හැකි හැම විටම ටෙලි නළු වලට දායක
හැම චරිතයම දිවි මග සොඳුරු සාධක
‘මුතුමිණ’ ඇරුණු කොට දුටු ‘ඉසුරුයෝගෙක’
තවමත් ජීවමානයි ‘ග්‍රාම සේවක’

කරලිය, ටෙලි තිරය සහ හෙළ සිනමාව
ඔපවත් කරන සේ නෙක දස්කම් පෑව
එයිනුත් නොනැවතී පලකල ප්‍රතිභාව
කළ එළි වුනා ඔබගෙන් ‘දොර මඩලාව’

මතකයි විවිධ හැඩතල සමග වික්රම
පාලුයි තිරය, කරලිය, සබය ඔක්කොම
ඔබ යන අතර තුර මූණටම දැක්කම
ආපසු හැරී එනු මැන ‘මනෝ’ එක්කම

UN