කමලා හැරිස් උප ජනාධිපති අපේක්ෂිකාව ලෙස තෝරාගැනීම​ අනුවණකමකි

කමලා හැරිස් උප ජනාධිපති අපේක්ෂිකාව ලෙස තෝරාගැනීම​ අනුවණකමකි

13 August 2020 03:30 pm

ජෝ බයිඩන්ගේ උප ජනාධිපති තරග සගයා ලෙස කමලා හැරිස් පත් කිරීමත් සමග ඇය ගැන විවිධ දේවල් කියවෙනවා දුටුවා. නමුත් සරලව කියන්න තියෙන්නෙ බයිඩන් ඓතිහාසික අනුවණකමක් කර ඇති බවයි.

කමලා කැලිෆෝර්නියාවේ සැන් ෆ්‍රැන්සිස්කෝ හි දිස්ත්‍රික් නීතිවේදී ලෙස ද, කැලිෆෝර්නියා ප්‍රාන්ත නීතිපති ලෙස ද කටයුතු කරන සමයන් හි ඇතැම් චුදිතයින් පිළිබඳ සාක්ෂි සඟවා ඔවුන් සිරගත කිරීමෙන් තම රැකියාවේ කාර්යය සාධනය ඉහළ බව පෙන්වන්න යත්න දැරූවෙක්. පොලිස් ප්‍රචණ්ඩ ක්‍රියා ගැන සාකච්ඡා වන මෙවන් සමයක එවන් අපේක්ෂිකාවක තෝරාගැනීම අමුතු වාසියක් ගෙනෙන්නේ නැහැ.

එමෙන්ම මෙවර ඩිමොක්‍රටික් පක්ෂ ජනාධිපති නාම යෝජනා සටනේදී ඇයගේ හැසිරීම අන්තිම නරක බව එහි විවාද නැරඹූ අය දන්නවා. සංස්කරණය කරන ලදුව පළ කරන ලද ඡායාරූපවල දිස්වන සුන්දරත්වය නම් එහිදී පෙනුණේ නැහැ. ඇය බොහෝවිට ඉතා පුද්ගලික මට්ටමෙන් තමාගේ පක්ෂයේම අනෙක් තරගකරුවන් පහත් කර කතා කළා.

බයිඩන් පිළිබඳ පවා ඇය බොහොම දරුණු ප්‍රකාශ සිදුකර තිබෙනවා. බයිඩන් විසින් තමන්ට අයුතු ලිංගික බලපෑම් කළේ යයි ඇතැම් කාන්තාවන් චෝදනා කරන විට හැරිස් ඔවුන් විශ්වාස කරන බව පවසා තිබුණා. සුදු සහ කළු ජාතිකයන් වෙන්කර තැබීම පිළිබඳ ඔහුගේ යම් අතීත ස්ථාවරයන් මෙන්ම ඒ වෙනුවෙන් පෙනී සිටි ඇතැමුන් සමග ඔහුගේ වූ සබඳතාවන් ඇගේ දැඩි ප්‍රහාරයට ලක් වුණා. එවන් අයෙක් සිය සටන් සගයා ලෙස තෝරාගැනීම ම ගැටළුවක් වනවා.

තෝරාගන්න තිබුණ අය ගැන මෙතනින් කියවන්න: ඩිමොක්‍රටික් 2020 උප ජනාධිපති අපේක්ෂිකාව කවුරුන් වේද?

තවමත් ජාතික මට්ටමේ මත විමසුම්වලදී මෙන්ම තියුණු සටනක් ඇති ප්‍රාන්ත වැඩි ප්‍රමාණයක ද ඉදිරියෙන් සිටින්නේ බයිඩන් බව සත්‍යයක්. එහෙත් ජනාධිපතිවරණයට තව මාස දෙකහමාරක් තිබෙනවා. මෙහිදී ඕනෑම දෙයක් විය හැකියි.

කමලා හැරිස්ගේ තෝරාගැනීම බයිඩන්ට වාසිදායක වන ක්‍රම කිහිපයක් තිබෙනවා. එකක් නම් කළු ජාතික ඡන්ද ඔහු වෙත ලැබීමට ඇති ඉඩයි. එහෙත් කොහොමත් කළු ජාතික ඡන්ද වැඩිපුර මෙවර ලැබෙන්නේ ඩිමොක්‍රටික් කඳවුරට බව අනුමාන කළ හැකියි. එම නිසා එහි විශාල වෙනසක් වේ යයි සිතීමට අපහසුයි.

ඊට වඩා වැදගත් කරුණක් නම් තමන් ඩිමොක්‍රටික් පක්ෂයේ වාමවාදී කඳවුරට යටත් නොවන්නකු බව බයිඩන් විසින් පෙන්වා දීමයි.

බයිඩන්ගේ වයස සහ ඔහු ඩිමෙන්‍ෂියාවෙන් පෙළෙන්නේ යයි වන සැකය හේතුවෙන් ඔහු සිය ධුර කාලය නිම නොකරනු ඇතැයි වන සැකය බොහෝ දෙනාට තිබෙනවා. මෑතකදී Rasmussen Reports විසින් කළ සමීක්ෂණයක දී සියයට 59 දෙනෙකු එම අදහස දක්වා තිබුණා. එවන් අවස්ථාවක කමලා හැරිස් වැනි කළු ජාතික කාන්තාවක ජනාධිපති වනු දැකීමට ඇමරිකානුවන් සූදානම් වෙයිද යන්න ද මෙම ජනාධිපතිවරණයේදී යම් වැදගත්කමක් ගන්නා ප්‍රශ්නයක් වනු ඇති.

ඇසි දිසි මානය