දේශපාලන විශේෂතා 10කින් හා ආර්ථික විශේෂතා 10කින් හෙබි අළුත් ආණ්ඩුවක් බිහිවීම!

දේශපාලන විශේෂතා 10කින් හා ආර්ථික විශේෂතා 10කින් හෙබි අළුත් ආණ්ඩුවක් බිහිවීම!

11 August 2020 01:01 pm

                                                  

2020 අගෝස්තු 05 දා පැවැත් වූ ශ්‍රී ලංකා ප්‍රජාතාන්ත්‍රික සමාජවාදී ජනරජයේ නව වැනි පාර්ලිමේන්තුව සඳහා වූ මහ මැතිවරණයෙන් මන්ත්‍රී ආසන 225න් 145ක් ම (එනම් 59%ක්) ලබා ගනිමින් අති විශිෂ්ට ජයක් ලැබූ පොදුජන පෙරමුණේ නායක මහින්ද රාජපක්ෂ මැතිදුන් අගෝස්තු 09 වැනි ඉරිදා පෙරවරු 09.28 ට උදා වූ සුභ මොහොතින් ජනපති ගෝඨාභය රාජපක්ෂ මහතා ඉදිරියේ දිවුරුම් දීම සිදු කෙරිණි. පොදු පෙරමුණට ලැබුණු ආසන 145ට TMVP,ශ්‍රී ලංකා නිදහස් පක්ෂය,EPDP සහ ප්‍රජාතන්ත්‍රවාදී මුස්ලිම් කොංග්‍රසය යන පක්ෂ ද එක්වීම සමඟ තුනෙන් දෙකක බහුතර බලයක් හිමිකර ගත් ආණ්ඩුවක් බවටද අගමැති මහින්ද රාජපක්ෂ මහතාගේ ආණ්ඩුව ඉතිහාසගත වන්නේ ජනපතිට ජනතාව ලබා දුන් ලක්ෂ 69 ට අසන්න මට්ටමක් වූ ලක්ෂ 68.5 ක බලයක් ජනතාව ලබා දුන් නිසාය. මෙම මැතිවරණයේ දේශපාලනික වැදගත්කම හා ආර්ථික වැදගත්කම ගැන කතාකිරීමට අදත් අප හමු වුණේ ශ්‍රී ලංකා මහ බැංකුවේ හිටපු අධ්‍යක්ෂවරයෙකු,ජ්‍යෙෂ්ඨ ආර්ථික විද්‍යාඥයෙකු හා ග්‍රන්ථ 65ක කතුවරයෙකු වන වින්සන් මර්වින් ප්‍රනාන්දු මහතාවය.

අප ඇසූ ප්‍රශ්නවලට එතුමා දුන් පිළිතුරු මෙසේ දක්වමු.

මෙම මහ මැතිවරණයේ ඔබ දකින දේශපාලන හා සමාජ සුවිශේෂතා මොනවද?

මේ ආණ්ඩුව පත්වීම සමඟම මම දේශපාලන විශේෂතා 10ක් දකිනවා. පළමු විශේෂතාව ලෙස මා දකින්නේ එක්සත් ජාතික පක්ෂය වැනි ඉතිහාසයයේ  නමක් තබා තිබූ පක්ෂයක වසර 43ක අඛණ්ඩ දේශපාලන ක්‍රියාකාරිකයෙකු ලෙස කටයුතු කළ වසර 26ක් එයට නායකත්වය දී අගමැති ධූරයත් විරුද්ධ පක්ෂයේ නායක ධූරයත් හෙබවූ දේශපාලනයේ පරිණතයෙකු වන රනිල් වික්‍රමසිංහ මහතා වැනි කෙනෙකුව පරාජය කොට දේශපාලනයෙන් සමුගැන්වීමට ජනතාව තීන්දු කිරීම.

දෙවන විශේෂත්වය ලෙස මා දකින්නේ වසර 50ක දේශපාලන ඉතිහාසයකට නෑකම් කියන දෙවරක්ම ජනපති ධූරය දැරූ තෙවතාවක්ම අගමැති ධූරය දැරූ මහින්ද රාජපක්ෂ මහතා යළිත් රටේ අගමැති බවට පත් කිරීමේ සුපුවත.

තෙවෙනි සුපුවත වන්නේ මෙතෙක් ආණ්ඩු බලය දිනාගත් ප්‍රබල පක්ෂ දෙක වන ශ්‍රී ලංකා නිදහස් පක්ෂය හා එක්සත් ජාතික පක්ෂය යන පක්ෂ දෙකම ජනතාව විසින් අමතක කොට ඉතාම අඩු කාලයක් තුළ ගොඩනැගුණු ශ්‍රී ලංකා පොදුජන පෙරමුණට ලක්ෂ 68.5ක ජන්ද එනම් මුළු ජන්දවලින් 59%ක් ලබා දී රටේ පාලන බලයට පත් කිරීමයි.

සිව් වන විශේෂතාව වන්නේ එක්සත් ජාතික පක්ෂයෙන් ඉවත් වී අලියා ලකුණ අහිමි කරගෙන ටෙලිෆෝනයෙන් තරඟ කළ ජාතික සමඟි බලවේගය නම් වූ නවතම පක්ෂයක් ඉතාම කෙටි කාලයක් තුළ ලක්ෂ 27.7ක ජන්ද ලබා මුළු ජන්දවලින් 24%ක් හිමිකර ගනිමින් රටේ විරුද්ධ පක්ෂය බවට පත් වීම.

පස්වන විශේෂත්වය ගැන මට මෙහෙම කියන්න පුළුවන්. Covid 19 වසංගතය ලොව පුරා පැතිර ගොස් තිබූ මොහොතක නව ජනපති විසින් මැතිවරණයක් පැවැත්වීමට තරම් සුදුසු මට්ටමකට Covid වසංගතය මර්දනය කොට මැතිවරණයක් පැවැත් වූ දකුණු ආසියාවේ පළමු රට හා ලෝකයේ එවැනි මැතිවරණයක් පැවැත් වූ 15 වන රට බව ශ්‍රී ලංකාව ලෝකය අතර නමක් තැබීමයි.

හයවන විශේෂත්වය වන්නේ තම බාල සොහොයුරා 2019 නොවැම්බර් පැවති ජනපතිවරණයෙන් ලක්ෂ 69ක ජන්ද ලබා ජනපති වෙද්දී,වැඩිමහල් සොහොයුරා ලෙස අගමැති ධූරයට පත්ව එමින් ශ්‍රී ලංකාවේ  හා ලෝකයේම ප්‍රථම වරට ''අයියා මලෝ''දෙදෙනක් අගමැති හා ජනපති ලෙස එකම කාලයක පත්ව රට පාලනය කිරීමට සූදානම් වීම.

හත්වන විශේෂත්වය ලෙස මම දකින්නේ ජනතා විමුක්ති පෙරමුණ නමින් මීට පෙර තරඟ කළ පක්ෂය ප්‍රථම වරට ''ජාතික ජන බලවේගය'' නමින් තරඟ කොට ආසන අඩු කර ගත්තත් ජන්ද ලබා ගැනීමේ අනුපිළිවෙල අනුව එක්සත් ජාතික පක්ෂය නම් වූ ජනතාව අතර ජනප්‍රිය වී සිටි පක්ෂයට ඉහළින් ජයග්‍රහණය කොට තෙවැනි තැන දිනාගැනීමයි.

අටවන විශේෂත්වය නම් 2015 ජනපති වූ මෛත්‍රීපාල සිරිසේන අගමැති රනිල් වික්‍රමසිංහ සමඟ එක්ව යහපාලන ආණ්ඩුවක් ගොඩනගා ගත්තත් දෙදෙනා අතර විරසක බව ක්‍රමයෙන් වැඩි වීම නිසා යළි වෙන්වීම හා එසේ වෙන් වූ ජනපති මෛත්‍රීපාල මෙවර යළි මන්ත්‍රීවරයෙකු ලෙස තේරී පත් වී අළුත් ආණ්ඩුවට එක්වීමත් අගමැති රනිල්ට තම කොළඹ ආසනයෙන්ද පැරදී මන්ත්‍රී ධූරය පවා අහිමි කරගෙන ඉවත්ව යෑමට සිදු වීම නිසා අළුත් ආණ්ඩුවට එක්වීමට තිබූ අවස්ථව අහිමි කර ගැනීම.

නවවන විශේෂත්වය වන්නේ අගමැති ලෙස දිවුරුම් දුන් මහින්ද රාජපක්ෂ මහතා කුරුණෑගල දිස්ත්‍රික්කයේ ජන්ද 527364ක් දිනාගෙන ප්‍රථමයා බවට පත්වීම.

දසවන විශේෂත්වය ලෙස මම දකින්නේ මහ බැංකුවේ හිටපු අධිපතිවරයෙකු වූ අජිත් නිවාඩ් කබ්රාල් මහතා ජන්දයට පෙර අගමැතිව සිටි මහින්ද රාජපක්ෂ මහතාගේ ආර්ථික උපදේශක ලෙස ක්‍රියාකිරීම හා නව ආණ්ඩුවේ ජාතික ලැයිස්තු මන්ත්‍රී ධූරයට පත් වීමත් අද හෙටම මුදල් රාජ්‍ය අමාත්‍ය ධූරය වැනි සුවිශේෂී තනතුරකට පත් වීමට නියමිතව තිබීම. එසේම යහපාලන රජයේ බැඳුම්කර මගඩිය ගැන එතුමා කතා කළ අතර ඊට හවුල් වූ සියලු දෙනාටම ජනතා අධිකරණයෙන් තීන්දුව ලබා දී ඒ අය බලයෙන් පහකරලීමද දක්වන්න පුළුවන්.

නව ආණ්ඩුවේ දේශපාලන සුවිශේෂතා 10ක් ඔබතුමා සදහන් කළා. අපට කියන්න පුළුවන්ද ජනතාව මේ අලුත් ආණ්ඩුව පත්කර ගැනීමට හේතු වූ ආර්ථික කරුණු 10ක්.

ඔව් පැහැදිලි ආර්ථික කරුණු 10ක් මෙම ජයග්‍රහණය පසුපස තිබෙන බව මට කියන්න පුළුවන්.

01.1948 සිට 2004 වන තෙක් බලයට පත්වූ ආණ්ඩු වසර 56ක් තුළම ඒ ඒ කාලවල රටේ ආර්ථික වර්ධනය සිදු කළේ සාමාන්‍යයෙන් වාර්ෂිකව 3%ක් 5%ක් අතර මට්ටමකින්. නිදහසින් පසු ප්‍රථම වරට එය 6.4%ක මට්ටමකින් වාර්ෂිකව වර්ධනය කළේ 2005 – 2014 කාලයේ ජනපතිව සිටි මහින්ද රාජපක්ෂ මැතිදුන්ගේ ආණ්ඩුව. එහෙත් එවැනි නායකයකු බලයෙන් පහකොට 2015 – 2019 කාලය තුල යහපාලන ආණ්ඩුවක් ජනතාව විසින් අටවා ගත්තත් රටේ ආර්ථික වර්ධනය වාර්ෂිකව අඩුවෙමින් ගොස් සාමාන්‍ය වර්ධනය 3.7%ක තරම් අඩු මට්ටමකට පත්කර ගත්තා. ඒ බව තේරුම් ගත් ජනතාව නිදහසින් පසු බලයට පත් සෑම නායකයෙකුටම වඩා රට ආර්ථික වශයෙන් වර්ධනය කිරීමට හැකි එකම පුද්ගලයා වන මහින්ද රාජපක්ෂ මැතිදුන් අගමැති කොට රටේ ජනපතිව සිටින තම සොහොයුරාට බලවත් කම්පනයක් ගෙන දුන් කොවිඩ් 19 නිසා ලෝක ආර්ථික වර්ධනයත් සෘණ වී දියුණු රටවල වර්ධනයත් සෘණ වී ශ්‍රී ලංකා ආර්ථිකයත් සෘණ වී යන මේ මොහොතේදී එම සෘණ වර්ධනය 2020 අවම කොට එය 2021 සිට ධන වර්ධනයත් කරදීමට සහය වීමට එක්කළ බව මුලින්ම මතක් කර දෙනවා.

02. රටක් වශයෙන් ගත් කළ  ඊළඟට වැදගත් වනුයේ රටේ ආදායමින් එක් පුද්ගලයෙකු අයත් වන ප්‍රමාණය හෙවත් ඒක පුද්ගල ආදායම ඉහළ නංවා ගැනීම. 1948 සිට බලයට පත් ආණ්ඩුව 2004 වනතුරු වසර 56ක කාලයක් තුළ ඒක පුද්ගල ආදායම තම ආණ්ඩු කාලය තුළ වාර්ෂිකව වැඩිකර දුන්නේ අඩුම වශයෙන් ඩොලර් 1ක් හා වැඩිම වශයෙන් ඩොලර් 37ක් පමණයි. එහෙත් 2005 – 2014 කාලය තුළ  ජනපතිව සිටි මහින්ද මැතිදුන් වාර්ෂිකව ඩොලර් 258 කින් ඒක පුද්ගල ආදායම වැඩිකර දුන්නා. එහෙත් 2015 – 2019 කාලය තුළ යහපාලන ආණ්ඩුව එය වැඩිකර දුන්නේ වාර්ෂිකව ඩොලර් 2 කින්. එපමණක් නොව 1948 සිට 1997 වනතුරු වසර 50ක් ශ්‍රී ලංකාව ලෝක බැංකු වර්ගීකරණයට අනුව දුප්පත් රටක් ලෙස නම්කර තිබුණා . 1997 දී ශ්‍රී ලංකාව පහළ ආදායම් කාණ්ඩයේ සිට පහළ මැදි ආදායම් කාණ්ඩයේ රටක් බවට පත්වුණා. එයට ඒ දක්වා බලයේ සිටි යූඑන්පී ආණ්ඩුවලට විශේෂයෙන් ස්තුති කළ යුතුයි. එවිට ඒක පුද්ගල ආදායම ඩොලර් 905ක්. එය 1063ක් වූයේ 2004 දී. මහින්ද මැතිදුන් ජනපති වී 2054 ක් බවට පත්කිරීම වසර 6 කින් සිදු කළා. ඔහු බලයෙන් යන විට (එනම් 2014 දී) එය ඩොලර් 3019 ක් දක්වා වසර 05 ක් තුළ ඩොලර් 1745 කින් වැඩි කර තිබුණේ. එහෙත් යහපාලන ආණ්ඩුව 2015 – 2019 කාලය තුල මුල් වසර 4 තුළ  4174 දක්වා ඩොලර් 237 ක් වැඩි කොට ශ්‍රී ලංකාව ඉහළ මැදි ආදායම් රටක් බවට පත් කිරීමේ ගෞරවය කලින් සිටි මහින්ද මැතිදුන්ගේ ක්‍රියාකාරිත්වය නිසා ලබාගත්තත් 2019 දී එනම් වර්ෂයක් තුළදීම යළි පහළ මැදි ආදායම් ගොඩට රට තල්ලු කරමින් වසර 18 කට පසු ඒක පුද්ගල ආදායම යළි ආපස්සට හරවා එනම් 2019 දී ඩොලර් 3852 ක් බවට පත්කොට 2018 ට සාපේක්ෂව ඩොලර් 227 ක් අඩුකොට බලයෙන් පහව ගියා. ඒ නිසාම වැටුණු ශ්‍රී ලංකාව ඉහළ මැදි ආදායම් රටක් බවට පත්කොට හැකි නම් ලෝකයේ පොහොසත් රටක් බවට පත් කිරීමට හැකියාව ඇති මහින්ද රාජපක්ෂ මැතිදුන්ට අගමැතිකම භාරදීමට ජනතාව තීරණය කළ බව 2020 මැතිවරණ ප්‍රතිඵලවලින් පෙනී යන දෙවන වැදගත් කරුණයි.

03. තම පාලනය කාලය තුළ රටේ මානව සංවර්ධන දර්ශකය 0.76ට නංවා ශ්‍රී ලංකාව ඉහළ මානව සංවර්ධිත රටක් බවට පත්කළ මහින්ද රාජපක්ෂ ජනපතිව මෙවර අගමැති කළේ එය 0.9ක මට්ටමට ඔසවා ශ්‍රී ලංකාව ඉහළම මානව දැනුමක් ඇති රටක් බවට පත්කිරීමට.

04. රජයේ අයවැය හිඟය මහින්ද මැතිදුන් 2005 බලයට එන විට -7.5%කට ඉහළ ගොස් තිබුණි. එය 2014 වන විට -5.7%කට අඩු කිරීමට ඔහු සමත් වුණා. එහෙත් යහපාලනය එය යළි -6.8%කට වැඩි කළා. Covid 19 නිසා ජනපතිට හා අගමැතිට අයවැය පාලනය තරමක් අසීරු වුවද එයද රටට ඔරොත්තු දෙන ආකාරයට අඩුකර දෙන බවට ජනතාව තුළ විශ්වාසයක් තිබීම යළි බලය දීමට තවත් ආර්ථික හේතුවක් වුණා.

05. 1948 – 2004 දක්වා පැවති ආණ්ඩුත් රටේ මුළු ණය ප්‍රමාණය 25% සිට 102.5% කට වැඩි කොට එතුමාට බලය දුන් විට මහා දැවැන්ත යටිතල පහසුකම් රැසක් ඇතිකොට (අධිවේගී මාර්ග 2ක්, ගුවන් තොටුපළක්, වරායක් ආදී වශයෙන්) රටේ මුළු ණය 72% කට අඩුකර ගියත් යහපාලන ආණ්ඩුව කිසිම වැඩක් නොකර රටේ ණය බර 87% ක් කරගෙන බලයෙන් පහ වුණා. එය යළි අඩුකර රට ණය බරින් නිදහස් කර දීමට යළි අගමැති ලෙස මහින්ද මැතිදුන් පත්කළ බව පෙනෙනවා.

06. එසේම රටේ ජීවන වියදම වැඩි කිරීමට හේතු වන උද්ධමන වේගය 1980 වන විට 26% ක්. පසුව  ඉලක්කම් දෙකේ උද්ධමන ඇති වුණා. මහින්ද ජනපති වන විට මහබැංකු අධිපති බවට පත්ව සිටි අජිත් නිවාඩ් කබ්රාල් මහතා 2009 සිට මේ දක්වා රටේ උද්ධමන වේගය තනි මැද ඉලක්කමකින් පවත්වාගෙන යාමට අවශ්‍ය පසුබිම සකස් කරදුන්නා. ගෝඨාභය මැතිදුන් ජනපති වන විට අගමැති ලෙස ක්‍රියා කළ මහින්ද මැතිදුන්ගේ ආර්ථික උපදේශක ලෙස ක්‍රියා කළ කබ්රාල් මහතා මේ වන විට ජාතික ලැයිස්තුවෙන් මන්ත්‍රී ධුරයකට පත්ව සිටිනවා. රටේ පවතින මුල්‍ය අර්බුදයට වහාම පිළියම් යෙදීමට එතුමාගේ සහය ලබා ගැනීමේ තත්ත්වයට එසවීමට නව අගමැති ලෙස පත්වූ මහින්ද මැතිදුන් ක්‍රියා කරන බවට ද ජනතාව තුළ විශ්වාසයක් පවතිනවා කියලා කියන්න පුළුවන්.

07. 2005 මහින්ද රාජපක්ෂ ජනපති වන විට ශ්‍රී ලංකාවේ ‘විදේශ අංශය’ දුර්වලව පැවති බව 2004 අග වන විට පැවති විදේශ සංචිත ප්‍රමාණය ඩොලර් බිලියන 2.2ක්ව පැවතීමෙන් පෙනෙනවා. ඔහු 2014 බලයෙන් ඉවත්ව යන විට එය ඩොලර් බිලියන 8.2ක් එනම් බිලියන 6ක් වැඩි කර තිබුණා. යළිත් යහපාලනය පැමිණ එය බිලියන 7.6කට අඩු කළ අතර වාර්ෂිකව ගෙවිය යුතු විදේශ ණය ප්‍රමාණය ඩොලර් බිලියන 5 – 6ත් අතර මට්ටමකට පත්ව තිබෙනවා. මේ අතර තුර කොවිඩ් 19 නිසා ඉතාම දුර්වල මට්ටමකට වැටුණු ශ්‍රී ලංකාවේ ‘විදේශ අංශය’ ශක්තිමත් කිරීමට හැකි ජනපති හා අගමැති කෙනෙකුට රට භාරදීමට කටයුතු කළ බව ඡන්ද ප්‍රතිඵලවලින් පෙනී යන ඊළඟ ආර්ථික කරුණයි.

08. 2005 ජනපති මහින්ද බලයට එන විට විදේශ විනිමය අනුපාතිකය  පැවතියේ ඩොලර් 1ක් රු. 101ක මට්ටමේ. එතුමා 2014 බලයෙන් ඉවත්ව යන විට එය රුපියල් 131ක්ව පැවතුණා. එනම් වසර 10ටම වැඩි වුණේ රුපියල් 30ක්. (වසරකට රුපියල් 3කි) එහෙත් යහපාලන කාලය නිම වන විට එය ඩොලර් 1ක් රු.182 කට ඉහළ ගියා. එනම් වසර 5කට රුපියල් 50ක් (වසරකට රු. 10ක්) ඉහළ ගියා. ජනපති ගෝඨාභය පැමිණ Covid 19 වසංගතය හමුවේ පවා  එය යළි ශක්තිමත් කළා. දැන් අගමැති ලෙස මහින්ද රාජපක්ෂ මැතිදුන් ජනතාව පත් කළ තවත් ආර්ථික හේතුවක් නම් රුපියලේ මේ බාහිර අගය ශක්තිමත් කිරීමට.

09. මුල් කාලවල රටේ ජනපති, අගමැති හා විශාල ඇමැති මණ්ඩලයක් නඩත්තු කිරීමට රටේ ජනතාවගේ බදු මුදල් විශාල ප්‍රමාණයක් නාස්ති කළා.මෙවර ඇමැති මණ්ඩලය ඉතාම අවම මට්ටමකට සීමා කරමින්, ජනපතිගේ වියදම් විශාල වශයෙන් කපා හරිමින් රට තුළ අනවශ්‍ය වියදම් අවම කිරීමටද ජනපතිට හා අගමැතිට බලය දුන් තවත් ආර්ථික කරුණක්.

10. වසර 30 ක යුද්ධයක් වසර 3 කින් නිම කළ ජනපති හා අගමැති දෙපළට යළි ජනතාව බලය දුන් අනෙක් අවසාන ආර්ථික හේතුව පාස්කු ඉරිදා ත්‍රස්තවාදය වැනි ත්‍රස්තවාදී කටයුතු රට තුළ ඇති නොවී ශක්තිමත් ආර්ථිකයක් ගොඩ නැගීමට.
ජනපති හා නව අගමැති ඇතුළු නව පාලනය වැටුණු ශ්‍රී ලංකා ආර්ථිකය යළි ක්‍රමයෙන් ගොඩනැගෙන ලෝක ආර්ථික සමග එක්වී ශ්‍රී ලංකා ආර්ථිකය ඉහළ නැංවීමට කටයුතු කරනු ඇත යන්න අප සැමගේ විශ්වාසය බව අවසාන වශයෙන් සදහන් කරනවා.