’’එදා වැහුණ කට අද ඇරෙයි’’ - MCC ගැන එජාපයේ දිව දෙකේ ස්ථාවරය අගමැති පහදයි

’’එදා වැහුණ කට අද ඇරෙයි’’ - MCC ගැන එජාපයේ දිව දෙකේ ස්ථාවරය අගමැති පහදයි

19 January 2020 06:15 pm

MCC ගිවිසුම සම්බන්ධයෙන් එක්සත් ජාතික පක්ෂයේ දිව දෙකේ ස්ථාවරය සම්බන්ධයෙන් අග්‍රාමාත්‍ය මහින්ද රාජපක්ෂ මහතා මාධ්‍ය නිවේදනයක් නිකුත් කර තිබේ. 

වත්මන් විපක්ෂ නායකවරයා සහ එක්සත් ජාතික පක්ෂ මන්ත්‍රීවරු දැන් එම MCC ගිවිසුම ඉරා දැමිය යුතු බවත් එය ක්‍රියාත්මක වීම වැළැක්විය යුතු බවටත් පොරකරමින් හිඳින නමුත් එම ගිවිසුම අත්සන් කිරීම සම්බන්ධයෙන් වූ යෝජනාව පැමිණියේ ඔවුන් ආණ්ඩු කළ සමයේ බව රාජපක්ෂ මහතා පෙන්වා දෙයි. 

ජනාධිපතිවරණයට දින කිහිපයක්ව තිබියදී එම ගිවිසුම අත්සන් කිරීම සඳහා නිල තීන්දුවක් ගෙන තිබූ අතර එය වැළැක්වීමට භික්ෂූන් වහන්සේලාට උපවාස කිරීමට සිදු වූ බවද පවසන අගමැතිවරයා කියා සිටින්නේ එවකට කැබිනට් අමාත්‍යවරයෙකු වූ වත්මන් විපක්ෂ නායකවරයා ඒ ගැන කිසිත් කතා නොකළ බවයි. 

එක්සත් ජාතික පක්ෂයේ ජනාධිපති අපේක්ෂකයා වශයෙන් හෝ ඔහු ජනාධිපතිවරණ වේදිකාවේ හෝ MCC ගිවිසුම ගැන කතා නොකළ බවයි අගමැතිවරයා පවසන්නේ. 

"ජනාධිපතිවරණයට දින කිහිපයක් තිබියදී එම එ.ජා.ප කැබිනට් මණ්ඩලය එම්.සී.සී ගිවිසුම අත්සන් කිරීමට නිල වශයෙන්ම තීන්දු කළේය. එම ගිවිසුම ජනාධිපතිවරණයට කළින් අත්සන් කරන බවත් එ.ජා.ප අග්‍රාමාත්‍යවරයා මාධ්‍යට පවසා සිටියේ ය. 

එම අවස්ථාවේදී විපක්‍ෂ නායකවරයාව සිටි මම, ලිඛිත නිවේදනයක් නිකුත් කරමින් ආණ්ඩුවට තරයේ පවසා සිටියේ පාර්ලිමේන්තුවට නොදන්වා, ජනතාවටත් මේ ගිවිසුමේ අන්තර්ගතය හෙළි නොකර, කිසිසේත්ම මෙය අත්සන් නොකළ යුතු බවයි. තවද ජනාධිපතිවරණයට දින ගණනක් තිබියදී මේ ආකාරයට විදේශීය රටක් සමඟ ගිවිසුමක් කඩිමුඩියේ අත්සන් කිරිම සදාචාර සම්පන්න නොවන බවද මම ඔවුන්ට පෙන්වා දුන්නෙමි. එම්.සී.සී ගිවිසුම ගැන තීන්දුවක් ගැනීම ජනාධිපතිවරණයෙන් පසුව, ජනවරම ලැබු පාර්ශවය සිදුකල යුතු බවද මම අවධාරණය කලෙමි. ඒ අවස්ථාවේදී එ.ජා.ප.යේ නියෝජ්‍ය නායකයා හා ප්‍රධාන කැබිනට් මණ්ඩල සාමාජිකයෙකු වූ වත්මන් විපක්‍ෂ නායකවරයා සිටියේ සම්පුර්ණයෙන්ම නිහඩවය. එ.ජා.ප.යේ ජනාධිපති අපේක්‍ෂකයා වූ ඔහු අඩුම වශයෙන් ජනාධිපතිවරණ වේදිකාවේදී වත් එම්.සී.සී ගිවිසුම ගැන වචනයක්වත් කියනු අපි අසා නැත. 

තමන්ගේ ආණ්ඩුව එම්.සී.සී ගිවිසුම පාර්ලිමේන්තුවටත්, ජනතාවටත්, වසන් කර කඩිමුඩියේ අත්සන් කිරීමට සැරසෙද්දි වචනයකින්වත් එම ක්‍රියාදාමයට එරෙහි නොවි සිටි වත්මන්  විපක්ෂ නායකවරයා, අලුතින් පත්වූ ආණ්ඩුවට එම්.සී.සී  ගිවිසුම ගැන දැනමුතුකම් කියමින් රට වටේම යයි. දේශපාලනයේදී අවම සදාචාරයක්වත් තිබිය යුතුය. එ.ජා.ප ආණ්ඩුව ජනාධිපතිවරණයට දවස් ගණනක් තිබියදී අත්තනෝමතික ආකරයට මේ ගිවිසුම අත්සන් කිරීමට උත්සාහ දැරූ අවස්ථාවේ, එය වැලැක්වීමට උඩදුම්බර කාශ්‍යප ස්වාමින් වහන්සේට උපවාස කිරීමට සිදුවූ හැටි අපට මතකය. 

එ.ජා.පය තුළ සිටින වත්මන් විපක්ෂ නායකවරයාගේ පාර්ශවයේ ප්‍රබලම නායකයෙකු වන මංගල සමරවීර හිටපු මුදල් ඇමතිවරයාත් මේ ගිවිසුම පාර්ලිමේන්තුවටත්, ජනතාවටත්, වසන් කර කඩිමුඩියේ අත්සන් කිරීමට පක්‍ෂ විය. එම්.සී.සී ගිවිසුම සම්බන්ධයෙන් එ.ජා.ප.යේ කල්ලි දෙකම හිටියේ  එකම ස්ථාවරයකය. 

ඒ සියල්ල ජනතාවට අමතක වී ඇතැයි සිතා එම්.සී.සී ගිවිසුම ගැන එ.ජා.ප විපක්ෂ නායකවරයා දැන් කරන කථා වලින් ඔවුන්ගේ දේශපාලන සදාචාරය කෙබදුදැයි ජනතාවට පැහැදිලි විය යුතුය.  එ.ජා.ප කැබිනට් මණ්ඩලය විසින් පසුගිය ඔක්තෝම්බර්  මාසයේ අනුමත කරපු එම්.සී.සී ගිවිසුමේ අන්තර්ගතය හදාරා බලා වාර්තා කිරීම පිණිස ජනාධිපතිතුමා විද්වත් කමිටුවක් පත්කොට ඇත. 

එම කමිටුවේ වාර්තාව සලකා බලා මේ සම්බන්ධයෙන් ගන්න පියවර කුමක් දැයි, කැබිනට් මණ්ඩලය ඉදිරියේදී  පාර්ලිමේන්තුවත් මහජනතාවත් දැනුවත් කිරීමට පියවර ගනු ඇත."

වත්මන් ආණ්ඩුව කිසිම හේතුවකටවත් මෙවැනි  ගිවිසුම් පාර්ලිමේන්තුවටත්, ජනතාවටත්, හොරෙන් අත්සන් නොකරන අතර රටට අහිතකර කිසිදු ගිවිසුමකට අත්සන් නොකරන බවද අග්‍රාමාත්‍යවරයා අවධාරණය කරයි. 

එක්සත් ජාතික පක්ෂය  ප්‍රමුඛ පාර්ශවයත්, ශ්‍රි ලංකා පොදුජන පෙරමුණ ප්‍රමුඛ ආණ්ඩුවත් අතර ඇති වෙනස එය බව හෙතෙම වැඩිදුරටත් කියා සිටියි.