හදිසියේ කැබිනෙට්ටුව කැඳවීම ගැන අගමැතිගෙන් පැහැදිලි කිරීමක් !

හදිසියේ කැබිනෙට්ටුව කැඳවීම ගැන අගමැතිගෙන් පැහැදිලි කිරීමක් !

22 September 2019 05:28 pm

පසුගිය බ්‍රහස්පතින්දා හදිසියේ කැබිනට් මණ්ඩලය රැස් කළේ ජනාධිපතිවරයාගේ වුවමනාවට මිස තමාගේ වුවමනාවට නොවන බව අග්‍රාමාත්‍ය රනිල් වික්‍රමසිංහ මහතා පවසයි. අද අරලියගහ මන්දිරයේදී ප්‍රකාශයක් සිදු කරමින් අගමැතිවරයා මේ බව කියා සිටියේය.

එදින පෙරවරුවේ ජනාධිපතිවරයා තමා අමතා හදිසියේ කැබිනෙට්ටුව රැස් කරන්නදැයි විමසූ බවත් ඊට තමාගේ විරෝධයක් නොමැති බව තමා පැවසූ බවත් අගමැතිවරයා පවසයි. කැබිනට් මණ්ඩල රැස්වීමට පෙර එජාප ඇමතිවරුන්ගේ රැස්වීමේදී 20 වැනි සංශෝධනය සම්බන්ධයෙන් කතා කිරීමට එජාප ඇමතිවරුන් බහුතරයක් විරුද්ධ වූ බවත් ඒ සම්බන්ධයෙන් කැබිනට් රැස්වීමට පෙර තමා ජනාධිපතිවරයා වෙත දැනුම් දුන් බවත් අගමැතිවරයා පවසයි.

අගමැතිවරයා විසින් අද සිදුකළ සම්පූර්ණ ප්‍රකාශය මෙසේය....

පසුගිය සතියේ සිවිල් සංවිධාන නියෝජිත පිරිසක් මා හමුවී අපේ ආණ්ඩුව කළ කටයුතු හා කිරීමට අතපසු වූ කටයුතු ගැන අදහස් දැක්වූවා. අපේ පක්‍ෂය 2014 වසරේ විධායක ජනාධිපති ධූරය අහෝසි කරන බවට යෝජනාවක් සම්මත කර ගත් බවත්, විධායක ජනාධිපති ක්‍රමය අහෝසි කිරීම වෙනුවෙන් අපි තව දුරටත් පෙනී සිටින බවත් මම ඔවුන්ට දැන්වූවා.

එවිට ඔවුන් ඉල්ලා සිටියේ 20 වන සංශෝධනය සඳහා සහය දීමේ කැබිනට්  තීරණයකට එළැඹෙන ලෙසයි. ඒ අනුව කැබිනට් මණ්ඩලය වෙත යොමු කිරීම සඳහා සැකසූ කෙටුම් පතක් ඔවුන් 16 වෙනිදා මට ලබා දුන්නා.

අනෙකුත් දේශපාලන පක්‍ෂවල සහය ලැබීමෙන් තොරව 20 වන සංශෝධනය පාර්ලිමේන්තුවේ සම්මත කර ගැනීමට නොහැකි බව මම සිවිල් සංවිධාන නියෝජිතයන්ට පෙන්වා දුන්නා. ඒ නිසා අනෙකුත් දේශපාලන පක්‍ෂවල අදහස මා වෙත දැනුම් දෙන ලෙස මම ඔවුන්ගෙන් ඉල්ලා සිටියා.

17 වන දා පාර්ලිමේන්තුවේදී සුමන්තිරන් මන්ත්‍රීතුමා මට පැවසුවේ විධායක ක්‍රමය අහෝසි කිරීම පිළිබඳව ඔවුන් ජනතා විමුක්ති පෙරමුණ සමග සාකච්ඡා පැවැත්වූ බවයි. ඒ වගේම ජනාධිපතිතුමාටත් 20 වන සංශෝධනය ගෙන ඒමට අවශ්‍ය බව ජනාධිපතිතුමා තමාට දැනුම් දුන් බව මන්ත්‍රීතුමා වැඩිදුරටත් දැන්වුවා. එතැනදී මම සුමන්තිරන් මන්ත්‍රීතුමාට පෙන්වා දුන්නේ මේ යෝජනාව පාර්ලිමේන්තුවේ සම්මත කර ගැනීමට නම් පොදුජන පෙරමුණේ සහයෝගයද අවශ්‍ය බවයි.

සුමන්තිරන් මන්ත්‍රීතුමා මේ පිළිබඳ ප්‍රසිද්ධ ප්‍රකාශයක් කර තිබෙනවා. ඒ ප්‍රකාශය කිසිවෙකු ප්‍රතික්ෂේප කර නැහැ.

19 වෙනිදා උදේ අටයි දාසයට ජනාධිපතිතුමා මට දුරකථන ඇමතුමක් දුන්නා. 20 වන සංශෝධනය පිළිබඳ සාකච්ඡා කිරීමට කැබිනට් රැස්වීමක් කැඳවන්නද කියා එතුමා මගෙන් විමසුවා. සිවිල් සමාජය මේ පිළිබඳ ඉල්ලීමක් කළ බව මම ජනාධිපතිතුමාට දැනුම් දුන්නා. ඒ වගේම මේ සම්බන්ධයෙන් ජනාධිපතිතුමාගේ ස්ථාවරය සුමන්තිරන් මන්ත්‍රී තුමා මට දැනුම් දී තිබුණා. ඒ නිසා කැබිනට් මන්ඩලය කැඳවා සාකච්ඡා කිරීම සුදුසු බව මම ජනාධිපතිතුමාට කිව්වා. බ්‍රහස්පතින්දා හෝ සිකුරාදා ඒ රැස්වීම කැඳවීම පහසු බවත් මම පැවසුවා.

එදින රවි කරුණානායක මහතා මට දුරකථන ඇමතුමක් දුන්නේ නැහැ.

උදේ නවය පමණ වෙද්දී කැබිනට් ලේකම්වරයා මගේ ලේකම්වරයාට එදින සවස තුනට කැබිනට් රැස්වීම පැවැත්වෙන බව දන්වා තිබුණා. ඉන් පසු මගේ ලේකම්වරයා සිවිල් සමාජය විසින් ඉදිරිපත් කරන ලද කෙටුම් පත අවශ්‍ය වුවහොත් ප්‍රයෝජනයට ගැනීම සඳහා කැබිනට් ලේකම්වරයා වෙත යොමු කළා.

සවස 02 ට ඇමතිවරුන් කැඳවා මම මේ ගැන දැනුම් දුන්නා. ඒ සාකච්ඡාව ඉතා උණුසුම් වුණා. සියළු දෙනා විවෘතව අදහස් පළ කළා. එහිදී 20 වන සංශෝධනය සඳහා එකඟත්වයක් ලැබුණේ නෑ.

මම කැබිනට් මණ්ඩල රැස්වීමට පෙර ජනාධිපතිතුමාට ඇමතිවරුන් අතර එකඟත්වයක් නැති බව දැනුම්දුන්නා. රැස්වීම  ආරම්භයේදී මම ජනාධිපතිතුමා ඉදිරිපිටදීම කැබිනට් ලේකම්වරයාට දැනුම් දුන්නේ, ඇමතිවරුන් අතර එකඟත්වයක් නැති නිසා කැබිනට් කෙටුම් පත ඉදිරිපත් කිරීමෙන් පලක් නොවන බවයි. ඇමතිවරුන් දැක්වූ අදහස් මම ඒ රැස්වීමේදී සම්පිණ්ඩනය කළා. ඇමැතිවරු විවිධ අදහස් පළ කළා. අවසන් තීරණය ගැනීම එක් එක් පක්‍ෂවලට භාර කිරීම සුදුසු බව අප නිගමනය කළා.

කැබිනට් මණ්ඩලයේ සාමාජිකයන්ගේ ප්‍රකාශ පිළිබඳව ප්‍රශ්නයක් තියෙනවා නම් එය සාකච්ඡා කළ යුත්තේ කැබිනට් මණ්ඩලය තුළදීයි. එසේ නොකිරීම කැබිනට් සම්ප්‍රදාය කඩකිරීමක්. ඒ නිසා මම මෙතැනදී පෙන්වාදෙන්නේ සිදු වුණු කරුණු පමණයි.

ඒ නිසා කිසිවෙකුට අවලාද නගන්නට හෝ දොස් කියන්නට හෝ මම කටයුතු කරන්නේ නැහැ.